2
עשה לך שתי חצוצרת כסף מקשה תעשה אתם והיו לך למקרא העדה ולמסע את המחנות׃
3
ותקעו בהן ונועדו אליך כל העדה אל פתח אהל מועד׃
4
ואם באחת יתקעו ונועדו אליך הנשיאים ראשי אלפי ישראל׃
5
ותקעתם תרועה ונסעו המחנות החנים קדמה׃
6
ותקעתם תרועה שנית ונסעו המחנות החנים תימנה תרועה יתקעו למסעיהם׃
7
ובהקהיל את הקהל תתקעו ולא תריעו׃
8
ובני אהרן הכהנים יתקעו בחצצרות והיו לכם לחקת עולם לדרתיכם׃
9
וכי תבאו מלחמה בארצכם על הצר הצרר אתכם והרעתם בחצצרות ונזכרתם לפני יהוה אלהיכם ונושעתם מאיביכם׃
10
וביום שמחתכם ובמועדיכם ובראשי חדשיכם ותקעתם בחצצרת על עלתיכם ועל זבחי שלמיכם והיו לכם לזכרון לפני אלהיכם אני יהוה אלהיכם׃
