וגר לא תונה ולא תלחצנו כי גרים הייתם בארץ מצרים׃

וגר לא תלחץ ואתם ידעתם את נפש הגר כי גרים הייתם בארץ מצרים׃

עשה משפט יתום ואלמנה ואהב גר לתת לו לחם ושמלה׃

ואהבתם את הגר כי גרים הייתם בארץ מצרים׃

לא תעשק שכיר עני ואביון מאחיך או מגרך אשר בארצך בשעריך׃

וקרבתי אליכם למשפט והייתי עד ממהר במכשפים ובמנאפים ובנשבעים לשקר ובעשקי שכר שכיר אלמנה ויתום ומטי גר ולא יראוני אמר יהוה צבאות׃

גר יתום ואלמנה לא תעשקו ודם נקי אל תשפכו במקום הזה ואחרי אלהים אחרים לא תלכו לרע לכם׃

אב ואם הקלו בך לגר עשו בעשק בתוכך יתום ואלמנה הונו בך׃

עם הארץ עשקו עשק וגזלו גזל ועני ואביון הונו ואת הגר עשקו בלא משפט׃