3
אם בחקתי תלכו ואת מצותי תשמרו ועשיתם אתם׃
4
ונתתי גשמיכם בעתם ונתנה הארץ יבולה ועץ השדה יתן פריו׃
5
והשיג לכם דיש את בציר ובציר ישיג את זרע ואכלתם לחמכם לשבע וישבתם לבטח בארצכם׃
6
ונתתי שלום בארץ ושכבתם ואין מחריד והשבתי חיה רעה מן הארץ וחרב לא תעבר בארצכם׃
7
ורדפתם את איביכם ונפלו לפניכם לחרב׃
8
ורדפו מכם חמשה מאה ומאה מכם רבבה ירדפו ונפלו איביכם לפניכם לחרב׃
9
ופניתי אליכם והפריתי אתכם והרביתי אתכם והקימתי את בריתי אתכם׃
10
ואכלתם ישן נושן וישן מפני חדש תוציאו׃
11
ונתתי משכני בתוככם ולא תגעל נפשי אתכם׃
12
והתהלכתי בתוככם והייתי לכם לאלהים ואתם תהיו לי לעם׃
