ונפשי נבהלה מאד ואת יהוה עד מתי׃

למנצח מזמור לדוד עד אנה יהוה תשכחני נצח עד אנה תסתיר את פניך ממני׃

עד אנה אשית עצות בנפשי יגון בלבבי יומם עד אנה ירום איבי עלי׃

אותתינו לא ראינו אין עוד נביא ולא אתנו ידע עד מה׃

עד מתי אלהים יחרף צר ינאץ אויב שמך לנצח׃

עד מה יהוה תסתר לנצח תבער כמו אש חמתך׃

עד מתי רשעים יהוה עד מתי רשעים יעלזו׃

יביעו ידברו עתק יתאמרו כל פעלי און׃

ראתה כי אתה עמל וכעס תביט לתת בידך עליך יעזב חלכה יתום אתה היית עוזר׃

טהור עינים מראות רע והביט אל עמל לא תוכל למה תביט בוגדים תחריש בבלע רשע צדיק ממנו׃

הצילה מחרב נפשי מיד כלב יחידתי׃

הושיעני מפי אריה ומקרני רמים עניתני׃

נפשי בתוך לבאם אשכבה להטים בני אדם שניהם חנית וחצים ולשונם חרב חדה׃

הצילני מטיט ואל אטבעה אנצלה משנאי וממעמקי מים׃

אל תשטפני שבלת מים ואל תבלעני מצולה ואל תאטר עלי באר פיה׃

הקשיבה אל רנתי כי דלותי מאד הצילני מרדפי כי אמצו ממני׃

הוציאה ממסגר נפשי להודות את שמך בי יכתרו צדיקים כי תגמל עלי׃