לדוד אליך יהוה אקרא צורי אל תחרש ממני פן תחשה ממני ונמשלתי עם יורדי בור׃

אך הוא צורי וישועתי משגבי לא אמוט רבה׃

על אלהים ישעי וכבודי צור עזי מחסי באלהים׃

והיה איש כמחבא רוח וסתר זרם כפלגי מים בציון כצל סלע כבד בארץ עיפה׃

אמר ליהוה מחסי ומצודתי אלהי אבטח בו׃

חסדי ומצודתי משגבי ומפלטי לי מגני ובו חסיתי הרודד עמי תחתי׃

יהוה עזי ומעזי ומנוסי ביום צרה אליך גוים יבאו מאפסי ארץ ויאמרו אך שקר נחלו אבותינו הבל ואין בם מועיל׃

ועוד וקויתי לו ועוד הנה אנכי והילדים אשר נתן לי יהוה׃

באברתו יסך לך ותחת כנפיו תחסה צנה וסחרה אמתו׃

וצפן לישרים תושיה מגן להלכי תם׃

שם אצמיח קרן לדוד ערכתי נר למשיחי׃

אלהי צורי אחסה בו מגני וקרן ישעי משגבי ומנוסי משעי מחמס תשעני׃

מגדל עז שם יהוה בו ירוץ צדיק ונשגב׃