עשה משפט יתום ואלמנה ואהב גר לתת לו לחם ושמלה׃

לא תטה משפט גר יתום ולא תחבל בגד אלמנה׃

וגר לא תונה ולא תלחצנו כי גרים הייתם בארץ מצרים׃

אם ענה תענה אתו כי אם צעק יצעק אלי שמע אשמע צעקתו׃

לא תהיה אחרי רבים לרעת ולא תענה על רב לנטת אחרי רבים להטת׃

ושחד לא תקח כי השחד יעור פקחים ויסלף דברי צדיקים׃

וגר לא תלחץ ואתם ידעתם את נפש הגר כי גרים הייתם בארץ מצרים׃

עד מתי תשפטו עול ופני רשעים תשאו סלה׃

פלטו דל ואביון מיד רשעים הצילו׃

שחד מחיק רשע יקח להטות ארחות משפט׃

פן ישתה וישכח מחקק וישנה דין כל בני עני׃

שמעו נא זאת ראשי בית יעקב וקציני בית ישראל המתעבים משפט ואת כל הישרה יעקשו׃

וקרבתי אליכם למשפט והייתי עד ממהר במכשפים ובמנאפים ובנשבעים לשקר ובעשקי שכר שכיר אלמנה ויתום ומטי גר ולא יראוני אמר יהוה צבאות׃