לא תטה משפט גר יתום ולא תחבל בגד אלמנה׃

ארור מטה משפט גר יתום ואלמנה ואמר כל העם אמן׃

לא תהיה אחרי רבים לרעת ולא תענה על רב לנטת אחרי רבים להטת׃

לא תטה משפט אבינך בריבו׃

ושחד לא תקח כי השחד יעור פקחים ויסלף דברי צדיקים׃

לא תעשו עול במשפט לא תשא פני דל ולא תהדר פני גדול בצדק תשפט עמיתך׃

ולא הלכו בניו בדרכו ויטו אחרי הבצע ויקחו שחד ויטו משפט׃

הנני ענו בי נגד יהוה ונגד משיחו את שור מי לקחתי וחמור מי לקחתי ואת מי עשקתי את מי רצותי ומיד מי לקחתי כפר ואעלים עיני בו ואשיב לכם׃

אם הניפותי על יתום ידי כי אראה בשער עזרתי׃

כתפי משכמה תפול ואזרעי מקנה תשבר׃

שחד מחיק רשע יקח להטות ארחות משפט׃

כי העשק יהולל חכם ויאבד את לב מתנה׃

למדו היטב דרשו משפט אשרו חמוץ שפטו יתום ריבו אלמנה׃

שריך סוררים וחברי גנבים כלו אהב שחד ורדף שלמנים יתום לא ישפטו וריב אלמנה לא יבוא אליהם׃

הלך צדקות ודבר מישרים מאס בבצע מעשקות נער כפיו מתמך בשחד אטם אזנו משמע דמים ועצם עיניו מראות ברע׃

שמנו עשתו גם עברו דברי רע דין לא דנו דין יתום ויצליחו ומשפט אביונים לא שפטו׃

שחד לקחו בך למען שפך דם נשך ותרבית לקחת ותבצעי רעיך בעשק ואתי שכחת נאם אדני יהוה׃

על הרע כפים להיטיב השר שאל והשפט בשלום והגדול דבר הות נפשו הוא ויעבתוה׃

על כן תפוג תורה ולא יצא לנצח משפט כי רשע מכתיר את הצדיק על כן יצא משפט מעקל׃

שריה בקרבה אריות שאגים שפטיה זאבי ערב לא גרמו לבקר׃

יהוה צדיק בקרבה לא יעשה עולה בבקר בבקר משפטו יתן לאור לא נעדר ולא יודע עול בשת׃

ויאמר פולוס אליהם הכה הכונו נגד כל העם בלא דין ומשפט ואנחנו אנשים רומיים וישליכו אתנו במשמר ועתה נסתר יגרשונו אל נא כי אם יבאו המה ויוציאונו׃

ויאמר אליו פולוס יככה אלהים הקיר המסיד האמנם ישב אתה לדין אתי כתורה ואתה מצוה להכותי שלא כתורה׃

ואצוה את שפטיכם בעת ההוא לאמר שמע בין אחיכם ושפטתם צדק בין איש ובין אחיו ובין גרו׃

לא תכירו פנים במשפט כקטן כגדל תשמעון לא תגורו מפני איש כי המשפט לאלהים הוא והדבר אשר יקשה מכם תקרבון אלי ושמעתיו׃

כי יהוה אלהיכם הוא אלהי האלהים ואדני האדנים האל הגדל הגבר והנורא אשר לא ישא פנים ולא יקח שחד׃

מדבר שקר תרחק ונקי וצדיק אל תהרג כי לא אצדיק רשע׃

ושחד לא תקח כי השחד יעור פקחים ויסלף דברי צדיקים׃

גם אלה לחכמים הכר פנים במשפט בל טוב׃

אל תהי עד חנם ברעך והפתית בשפתיך׃

ויפתח פטרוס את פיו ויאמר עתה ידעתי באמת כי האלהים איננו נשא פנים׃