אתם לפי הבשר תשפטו ואני לא אשפט איש׃

ואצוה את שפטיכם בעת ההוא לאמר שמע בין אחיכם ושפטתם צדק בין איש ובין אחיו ובין גרו׃

לא תכירו פנים במשפט כקטן כגדל תשמעון לא תגורו מפני איש כי המשפט לאלהים הוא והדבר אשר יקשה מכם תקרבון אלי ושמעתיו׃

שפטים ושטרים תתן לך בכל שעריך אשר יהוה אלהיך נתן לך לשבטיך ושפטו את העם משפט צדק׃

לא תטה משפט לא תכיר פנים ולא תקח שחד כי השחד יעור עיני חכמים ויסלף דברי צדיקם׃

למנצח אל תשחת לדוד מכתם האמנם אלם צדק תדברון מישרים תשפטו בני אדם׃

אף בלב עולת תפעלון בארץ חמס ידיכם תפלסון׃

עד מתי תשפטו עול ופני רשעים תשאו סלה׃

היחברך כסא הוות יצר עמל עלי חק׃

יגודו על נפש צדיק ודם נקי ירשיעו׃

מצדיק רשע ומרשיע צדיק תועבת יהוה גם שניהם׃

גם אלה לחכמים הכר פנים במשפט בל טוב׃

מצדיקי רשע עקב שחד וצדקת צדיקים יסירו ממנו׃

והריחו ביראת יהוה ולא למראה עיניו ישפוט ולא למשמע אזניו יוכיח׃

ושפט בצדק דלים והוכיח במישור לענוי ארץ והכה ארץ בשבט פיו וברוח שפתיו ימית רשע׃

אחי אל יהי משא פנים באמונתכם בישוע המשיח אדנינו אדון הכבוד׃

הלא בזאת נחלק לבכם והנכם שפטים בעלי מחשבות רעות׃

אולם אם תשאו פנים תחטאו במעשיכם והתורה תוכיחכם כעברים אותה׃