והקמתי את בריתי ביני ובינך ובין זרעך אחריך לדרתם לברית עולם להיות לך לאלהים ולזרעך אחריך׃

ועשה חסד לאלפים לאהבי ולשמרי מצותי׃

ויעבר יהוה על פניו ויקרא יהוה יהוה אל רחום וחנון ארך אפים ורב חסד ואמת׃

נצר חסד לאלפים נשא עון ופשע וחטאה ונקה לא ינקה פקד עון אבות על בנים ועל בני בנים על שלשים ועל רבעים׃

מה רב טובך אשר צפנת ליראיך פעלת לחסים בך נגד בני אדם׃

אך קרוב ליראיו ישעו לשכן כבוד בארצנו׃

כי כגבה שמים על הארץ גבר חסדו על יראיו׃

וחסד יהוה מעולם ועד עולם על יראיו וצדקתו לבני בנים׃

לשמרי בריתו ולזכרי פקדיו לעשותם׃

יברך יראי יהוה הקטנים עם הגדלים׃

יאמרו נא יראי יהוה כי לעולם חסדו׃

רצון יראיו יעשה ואת שועתם ישמע ויושיעם׃

רוצה יהוה את יראיו את המיחלים לחסדו׃

אז נדברו יראי יהוה איש את רעהו ויקשב יהוה וישמע ויכתב ספר זכרון לפניו ליראי יהוה ולחשבי שמו׃

ושבתם וראיתם בין צדיק לרשע בין עבד אלהים לאשר לא עבדו׃

וקול יוצא מן הכסא ויאמר הללו את אלהינו כל עבדיו ויראיו הקטנים עם הגדולים׃