כי תאנה לא תפרח ואין יבול בגפנים כחש מעשה זית ושדמות לא עשה אכל גזר ממכלה צאן ואין בקר ברפתים׃

ואני ביהוה אעלוזה אגילה באלהי ישעי׃

ויזרע יצחק בארץ ההוא וימצא בשנה ההוא מאה שערים ויברכהו יהוה׃

אם בחקתי תלכו ואת מצותי תשמרו ועשיתם אתם׃

והשיג לכם דיש את בציר ובציר ישיג את זרע ואכלתם לחמכם לשבע וישבתם לבטח בארצכם׃

ורדפתם את איביכם ונפלו לפניכם לחרב׃

ופניתי אליכם והפריתי אתכם והרביתי אתכם והקימתי את בריתי אתכם׃

ונתתי משכני בתוככם ולא תגעל נפשי אתכם׃

אני יהוה אלהיכם אשר הוצאתי אתכם מארץ מצרים מהית להם עבדים ואשבר מטת עלכם ואולך אתכם קוממיות׃

נתון תתן לו ולא ירע לבבך בתתך לו כי בגלל הדבר הזה יברכך יהוה אלהיך בכל מעשך ובכל משלח ידך׃

ובאו עליך כל הברכות האלה והשיגך כי תשמע בקול יהוה אלהיך׃

ברוך פרי בטנך ופרי אדמתך ופרי בהמתך שגר אלפיך ועשתרות צאנך׃

ברוך אתה בבאך וברוך אתה בצאתך׃

יצו יהוה אתך את הברכה באסמיך ובכל משלח ידך וברכך בארץ אשר יהוה אלהיך נתן לך׃

וראו כל עמי הארץ כי שם יהוה נקרא עליך ויראו ממך׃

יפתח יהוה לך את אוצרו הטוב את השמים לתת מטר ארצך בעתו ולברך את כל מעשה ידך והלוית גוים רבים ואתה לא תלוה׃

ולא תסור מכל הדברים אשר אנכי מצוה אתכם היום ימין ושמאול ללכת אחרי אלהים אחרים לעבדם׃

יהוה צבאות אשרי אדם בטח בך׃

שיר המעלות אשרי כל ירא יהוה ההלך בדרכיו׃

אשתך כגפן פריה בירכתי ביתך בניך כשתלי זיתים סביב לשלחנך׃

יברכך יהוה מציון וראה בטוב ירושלם כל ימי חייך׃

כטל חרמון שירד על הררי ציון כי שם צוה יהוה את הברכה חיים עד העולם׃

כבד את יהוה מהונך ומראשית כל תבואתך׃

וימלאו אסמיך שבע ותירוש יקביך יפרצו׃

ועתה לא כימים הראשנים אני לשארית העם הזה נאם יהוה צבאות׃

והיה כאשר הייתם קללה בגוים בית יהודה ובית ישראל כן אושיע אתכם והייתם ברכה אל תיראו תחזקנה ידיכם׃

כן שבתי זממתי בימים האלה להיטיב את ירושלם ואת בית יהודה אל תיראו׃

הביאו את כל המעשר אל בית האוצר ויהי טרף בביתי ובחנוני נא בזאת אמר יהוה צבאות אם לא אפתח לכם את ארבות השמים והריקתי לכם ברכה עד בלי די׃

אך בקשו בראשונה את מלכות אלהים ואת צדקתו ונוסף לכם כל אלה׃