אז ידבר יהושע ליהוה ביום תת יהוה את האמרי לפני בני ישראל ויאמר לעיני ישראל שמש בגבעון דום וירח בעמק אילון׃

וידם השמש וירח עמד עד יקם גוי איביו הלא היא כתובה על ספר הישר ויעמד השמש בחצי השמים ולא אץ לבוא כיום תמים׃

כי כהר פרצים יקום יהוה כעמק בגבעון ירגז לעשות מעשהו זר מעשהו ולעבד עבדתו נכריה עבדתו׃

הנני משיב את צל המעלות אשר ירדה במעלות אחז בשמש אחרנית עשר מעלות ותשב השמש עשר מעלות במעלות אשר ירדה׃

בכל הארץ יצא קום ובקצה תבל מליהם לשמש שם אהל בהם׃

ויהי בנסם מפני ישראל הם במורד בית חורן ויהוה השליך עליהם אבנים גדלות מן השמים עד עזקה וימתו רבים אשר מתו באבני הברד מאשר הרגו בני ישראל בחרב׃

מנגה נגדו עביו עברו ברד וגחלי אש׃

וישלח חציו ויפיצם וברקים רב ויהמם׃

זרמו מים עבות קול נתנו שחקים אף חצציך יתהלכו׃

קול רעמך בגלגל האירו ברקים תבל רגזה ותרעש הארץ׃

יהוה הט שמיך ותרד גע בהרים ויעשנו׃

ברוק ברק ותפיצם שלח חציך ותהמם׃