למנצח על השמינית מזמור לדוד הושיעה יהוה כי גמר חסיד כי פסו אמונים מבני אדם׃

שוא ידברו איש את רעהו שפת חלקות בלב ולב ידברו׃

בלע אדני פלג לשונם כי ראיתי חמס וריב בעיר׃

הוות בקרבה ולא ימיש מרחבה תך ומרמה׃

כי קנאתי בהוללים שלום רשעים אראה׃

בעמל אנוש אינמו ועם אדם לא ינגעו׃

יצא מחלב עינמו עברו משכיות לבב׃

שתו בשמים פיהם ולשונם תהלך בארץ׃

אויה לי כי גרתי משך שכנתי עם אהלי קדר׃

רבת שכנה לה נפשי עם שונא שלום׃

ושבתי אני ואראה את כל העשקים אשר נעשים תחת השמש והנה דמעת העשקים ואין להם מנחם ומיד עשקיהם כח ואין להם מנחם׃

אם עשק רש וגזל משפט וצדק תראה במדינה אל תתמה על החפץ כי גבה מעל גבה שמר וגבהים עליהם׃

מי יתנני במדבר מלון ארחים ואעזבה את עמי ואלכה מאתם כי כלם מנאפים עצרת בגדים׃

איש מרעהו השמרו ועל כל אח אל תבטחו כי כל אח עקוב יעקב וכל רע רכיל יהלך׃

שבתך בתוך מרמה במרמה מאנו דעת אותי נאם יהוה׃

ואתה בן אדם אל תירא מהם ומדבריהם אל תירא כי סרבים וסלונים אותך ואל עקרבים אתה יושב מדבריהם אל תירא ומפניהם אל תחת כי בית מרי המה׃

אללי לי כי הייתי כאספי קיץ כעללת בציר אין אשכול לאכול בכורה אותה נפשי׃

על הרע כפים להיטיב השר שאל והשפט בשלום והגדול דבר הות נפשו הוא ויעבתוה׃

הנני שלח אתכם ככבשים בין הזאבים לכן היו ערומים כנחשים ותמימים כיונים׃

כי הצדיק הזה בשבתו בתוכם האדיב את נפשו הישרה יום יום בראותו ובשמעו מעשי רשעם׃