יערף כמטר לקחי תזל כטל אמרתי כשעירם עלי דשא וכרביבים עלי עשב׃

וכאור בקר יזרח שמש בקר לא עבות מנגה ממטר דשא מארץ׃

שרשי פתוח אלי מים וטל ילין בקצירי׃

ירד כמטר על גז כרביבים זרזיף ארץ׃

נהם ככפיר זעף מלך וכטל על עשב רצונו׃

כי כה אמר יהוה אלי אשקוטה ואביטה במכוני כחם צח עלי אור כעב טל בחם קציר׃

יחיו מתיך נבלתי יקומון הקיצו ורננו שכני עפר כי טל אורת טלך וארץ רפאים תפיל׃

כי אצק מים על צמא ונזלים על יבשה אצק רוחי על זרעך וברכתי על צאצאיך׃

והיה שארית יעקב בקרב עמים רבים כטל מאת יהוה כרביבים עלי עשב אשר לא יקוה לאיש ולא ייחל לבני אדם׃

אני חבצלת השרון שושנת העמקים׃

כשושנה בין החוחים כן רעיתי בין הבנות׃

דודי לי ואני לו הרעה בשושנים׃

שני שדיך כשני עפרים תאומי צביה הרועים בשושנים׃

וללבוש למה תדאגו התבוננו נא אל שושני השדה הצמחות אינן עמלות ואינן טות׃

התבוננו אל השושנים הצמחות ואינן טות ואינן ארגות ואני אמר לכם כי גם שלמה בכל הדרו לא היה לבוש כאחת מהנה׃

ויספה פליטת בית יהודה הנשארה שרש למטה ועשה פרי למעלה׃

יהי פסת בר בארץ בראש הרים ירעש כלבנון פריו ויציצו מעיר כעשב הארץ׃

הבאים ישרש יעקב יציץ ופרח ישראל ומלאו פני תבל תנובה׃

פרח תפרח ותגל אף גילת ורנן כבוד הלבנון נתן לה הדר הכרמל והשרון המה יראו כבוד יהוה הדר אלהינו׃

כה אמר אדני יהוה ולקחתי אני מצמרת הארז הרמה ונתתי מראש ינקותיו רך אקטף ושתלתי אני על הר גבה ותלול׃

וידעו כל עצי השדה כי אני יהוה השפלתי עץ גבה הגבהתי עץ שפל הובשתי עץ לח והפרחתי עץ יבש אני יהוה דברתי ועשיתי׃

שישכן המשיח בלבבכם באמונה והייתם משרשים ומיסדים באהבה׃