3
הבוק תבוק הארץ והבוז תבוז כי יהוה דבר את הדבר הזה׃
4
אבלה נבלה הארץ אמללה נבלה תבל אמללו מרום עם הארץ׃
5
והארץ חנפה תחת ישביה כי עברו תורת חלפו חק הפרו ברית עולם׃
6
על כן אלה אכלה ארץ ויאשמו ישבי בה על כן חרו ישבי ארץ ונשאר אנוש מזער׃
7
אבל תירוש אמללה גפן נאנחו כל שמחי לב׃
8
שבת משוש תפים חדל שאון עליזים שבת משוש כנור׃
9
בשיר לא ישתו יין ימר שכר לשתיו׃
10
נשברה קרית תהו סגר כל בית מבוא׃
11
צוחה על היין בחוצות ערבה כל שמחה גלה משוש הארץ׃
12
נשאר בעיר שמה ושאיה יכת שער׃