ויהוה צבאות שפט צדק בחן כליות ולב אראה נקמתך מהם כי אליך גליתי את ריבי׃

חללה לך מעשת כדבר הזה להמית צדיק עם רשע והיה כצדיק כרשע חללה לך השפט כל הארץ לא יעשה משפט׃

הצור תמים פעלו כי כל דרכיו משפט אל אמונה ואין עול צדיק וישר הוא׃

לך לבדך חטאתי והרע בעיניך עשיתי למען תצדק בדברך תזכה בשפטך׃

ידעתי יהוה כי צדק משפטיך ואמונה עניתני׃

צדיק אתה יהוה וישר משפטיך׃

צדיק יהוה בכל דרכיו וחסיד בכל מעשיו׃

לך אדני הצדקה ולנו בשת הפנים כיום הזה לאיש יהודה וליושבי ירושלם ולכל ישראל הקרבים והרחקים בכל הארצות אשר הדחתם שם במעלם אשר מעלו בך׃

טהור עינים מראות רע והביט אל עמל לא תוכל למה תביט בוגדים תחריש בבלע רשע צדיק ממנו׃

כלה בחכה העלה יגרהו בחרמו ויאספהו במכמרתו על כן ישמח ויגיל׃

העל כן יריק חרמו ותמיד להרג גוים לא יחמול׃

יהוה צדיק בקרבה לא יעשה עולה בבקר בבקר משפטו יתן לאור לא נעדר ולא יודע עול בשת׃

ואם עולתנו תרומם את צדקת האלהים מה נאמר הכי יש עול באלהים המשלח חרון אפו לפי דרך בני אדם אנכי מדבר׃

חלילה שאם כן איך ישפט האלהים את העולם׃

אולם אני אל שדי אדבר והוכח אל אל אחפץ׃

קרבו ריבכם יאמר יהוה הגישו עצמותיכם יאמר מלך יעקב׃

שמנו עשתו גם עברו דברי רע דין לא דנו דין יתום ויצליחו ומשפט אביונים לא שפטו׃

ישליו אהלים לשדדים ובטחות למרגיזי אל לאשר הביא אלוה בידו׃

מדוע רשעים יחיו עתקו גם גברו חיל׃

בתיהם שלום מפחד ולא שבט אלוה עליהם׃

ישלחו כצאן עויליהם וילדיהם ירקדון׃

יבלו בטוב ימיהם וברגע שאול יחתו׃

מה שדי כי נעבדנו ומה נועיל כי נפגע בו׃

לדוד אל תתחר במרעים אל תקנא בעשי עולה׃

ראיתי רשע עריץ ומתערה כאזרח רענן׃

כי קנאתי בהוללים שלום רשעים אראה׃

בעמל אנוש אינמו ועם אדם לא ינגעו׃

יצא מחלב עינמו עברו משכיות לבב׃

שתו בשמים פיהם ולשונם תהלך בארץ׃

ואמרו איכה ידע אל ויש דעה בעליון׃

אך ריק זכיתי לבבי וארחץ בנקיון כפי׃

אם אמרתי אספרה כמו הנה דור בניך בגדתי׃

עד אבוא אל מקדשי אל אבינה לאחריתם׃

איך היו לשמה כרגע ספו תמו מן בלהות׃

כי יתחמץ לבבי וכליותי אשתונן׃

ואני תמיד עמך אחזת ביד ימיני׃

מי לי בשמים ועמך לא חפצתי בארץ׃

כי הנה רחקיך יאבדו הצמתה כל זונה ממך׃

בפרח רשעים כמו עשב ויציצו כל פעלי און להשמדם עדי עד׃

עד מתי רשעים יהוה עד מתי רשעים יעלזו׃

יביעו ידברו עתק יתאמרו כל פעלי און׃

כי משובת פתים תהרגם ושלות כסילים תאבדם׃

על כן תפוג תורה ולא יצא לנצח משפט כי רשע מכתיר את הצדיק על כן יצא משפט מעקל׃

ועתה אנחנו מאשרים זדים גם נבנו עשי רשעה גם בחנו אלהים וימלטו׃

כי גם אחיך ובית אביך גם המה בגדו בך גם המה קראו אחריך מלא אל תאמן בם כי ידברו אליך טובות׃

כי בגוד בגדו בי בית ישראל ובית יהודה נאם יהוה׃

גם לא שמעת גם לא ידעת גם מאז לא פתחה אזנך כי ידעתי בגוד תבגוד ופשע מבטן קרא לך׃

והמה כאדם עברו ברית שם בגדו בי׃