משא מצרים הנה יהוה רכב על עב קל ובא מצרים ונעו אלילי מצרים מפניו ולבב מצרים ימס בקרבו׃

כה אמר יהוה השמים כסאי והארץ הדם רגלי אי זה בית אשר תבנו לי ואי זה מקום מנוחתי׃

יושב בשמים ישחק אדני ילעג למו׃

יהוה למבול ישב וישב יהוה מלך לעולם׃

לרכב בשמי שמי קדם הן יתן בקולו קול עז׃

הן גוים כמר מדלי וכשחק מאזנים נחשבו הן איים כדק יטול׃

כל הגוים כאין נגדו מאפס ותהו נחשבו לו׃

ושם ראינו את הנפילים בני ענק מן הנפלים ונהי בעינינו כחגבים וכן היינו בעיניהם׃

כה אמר האל יהוה בורא השמים ונוטיהם רקע הארץ וצאצאיה נתן נשמה לעם עליה ורוח להלכים בה׃

כה אמר יהוה גאלך ויצרך מבטן אנכי יהוה עשה כל נטה שמים לבדי רקע הארץ מי אתי׃

ותשכח יהוה עשך נוטה שמים ויסד ארץ ותפחד תמיד כל היום מפני חמת המציק כאשר כונן להשחית ואיה חמת המציק׃

נטה שמים לבדו ודורך על במתי ים׃

תרקיע עמו לשחקים חזקים כראי מוצק׃

איפה היית ביסדי ארץ הגד אם ידעת בינה׃

על מה אדניה הטבעו או מי ירה אבן פנתה׃

ויסך בדלתים ים בגיחו מרחם יצא׃

לפנים הארץ יסדת ומעשה ידיך שמים׃

המה יאבדו ואתה תעמד וכלם כבגד יבלו כלבוש תחליפם ויחלפו׃

עטה אור כשלמה נוטה שמים כיריעה׃

עשה ארץ בכחו מכין תבל בחכמתו ובתבונתו נטה שמים׃

משא דבר יהוה על ישראל נאם יהוה נטה שמים ויסד ארץ ויצר רוח אדם בקרבו׃

ועוד אתה אדני לפנים הארץ יסדת ומעשה ידיך שמים׃

כלבוש תחליפם ויחלפו ואתה הוא ושנותיך לא יתמו׃