אני לדודי ועלי תשוקתו׃

הנך יפה רעיתי הנך יפה עיניך יונים׃

הנך יפה דודי אף נעים אף ערשנו רעננה׃

יונתי בחגוי הסלע בסתר המדרגה הראיני את מראיך השמיעיני את קולך כי קולך ערב ומראיך נאוה׃

כלך יפה רעיתי ומום אין בך׃

מה יפו דדיך אחתי כלה מה טבו דדיך מיין וריח שמניך מכל בשמים׃

ויתאו המלך יפיך כי הוא אדניך והשתחוי לו׃

לא יאמר לך עוד עזובה ולארצך לא יאמר עוד שממה כי לך יקרא חפצי בה ולארצך בעולה כי חפץ יהוה בך וארצך תבעל׃

כי יבעל בחור בתולה יבעלוך בניך ומשוש חתן על כלה ישיש עליך אלהיך׃

יהוה אלהיך בקרבך גבור יושיע ישיש עליך בשמחה יחריש באהבתו יגיל עליך ברנה׃