שנאה תעורר מדנים ועל כל פשעים תכסה אהבה׃

רק בזדון יתן מצה ואת נועצים חכמה׃

איש חמה יגרה מדון וארך אפים ישקיט ריב׃

זד יהיר לץ שמו עושה בעברת זדון׃

גרש לץ ויצא מדון וישבת דין וקלון׃

איש אף יגרה מדון ובעל חמה רב פשע׃

יהוה צבאות אשרי אדם בטח בך׃

ברוך הגבר אשר יבטח ביהוה והיה יהוה מבטחו׃

והיה כעץ שתול על מים ועל יובל ישלח שרשיו ולא ירא כי יבא חם והיה עלהו רענן ובשנת בצרת לא ידאג ולא ימיש מעשות פרי׃

ואף אמנם יתרון גדול היא החסידות עם לב שמח בגורלו׃

נפש ברכה תדשן ומרוה גם הוא יורא׃

מתאוה ואין נפשו עצל ונפש חרצים תדשן׃

מאור עינים ישמח לב שמועה טובה תדשן עצם׃

ונחך יהוה תמיד והשביע בצחצחות נפשך ועצמתיך יחליץ והיית כגן רוה וכמוצא מים אשר לא יכזבו מימיו׃