שמחה לאיש במענה פיו ודבר בעתו מה טוב׃

לב צדיק יהגה לענות ופי רשעים יביע רעות׃

אדם ערום כסה דעת ולב כסילים יקרא אולת׃

כל ערום יעשה בדעת וכסיל יפרש אולת׃

לב חכם ישכיל פיהו ועל שפתיו יסיף לקח׃

תפוחי זהב במשכיות כסף דבר דבר על אפניו׃

נזם זהב וחלי כתם מוכיח חכם על אזן שמעת׃

למנצח על ששנים לבני קרח משכיל שיר ידידת רחש לבי דבר טוב אמר אני מעשי למלך לשוני עט סופר מהיר׃

דברי פי חכם חן ושפתות כסיל תבלענו׃

תחלת דברי פיהו סכלות ואחרית פיהו הוללות רעה׃

אדני יהוה נתן לי לשון למודים לדעת לעות את יעף דבר יעיר בבקר בבקר יעיר לי אזן לשמע כלמודים׃

הנה יביעון בפיהם חרבות בשפתותיהם כי מי שמע׃