אל תהי חכם בעיניך ירא את יהוה וסור מרע׃

רפאות תהי לשרך ושקוי לעצמותיך׃

אל תירא מפחד פתאם ומשאת רשעים כי תבא׃

כי יהוה יהיה בכסלך ושמר רגלך מלכד׃

יראת יהוה לחיים ושבע ילין בל יפקד רע׃

לולי אלהי אבי אלהי אברהם ופחד יצחק היה לי כי עתה ריקם שלחתני את עניי ואת יגיע כפי ראה אלהים ויוכח אמש׃

חנה מלאך יהוה סביב ליראיו ויחלצם׃

יראו את יהוה קדשיו כי אין מחסור ליראיו׃

לכו בנים שמעו לי יראת יהוה אלמדכם׃

הללו יה אשרי איש ירא את יהוה במצותיו חפץ מאד׃

כי לעולם לא ימוט לזכר עולם יהיה צדיק׃

סמוך לבו לא יירא עד אשר יראה בצריו׃

יברך יראי יהוה הקטנים עם הגדלים׃

יסף יהוה עליכם עליכם ועל בניכם׃

טוב אשר תאחז בזה וגם מזה אל תנח את ידך כי ירא אלהים יצא את כלם׃

אז נדברו יראי יהוה איש את רעהו ויקשב יהוה וישמע ויכתב ספר זכרון לפניו ליראי יהוה ולחשבי שמו׃

ושבתם וראיתם בין צדיק לרשע בין עבד אלהים לאשר לא עבדו׃

וזרחה לכם יראי שמי שמש צדקה ומרפא בכנפיה ויצאתם ופשתם כעגלי מרבק׃

ויהי שלום לקהלות בכל מקמות יהודה והגליל ושמרון ותבנינה ותתהלכנה ביראת האדון ותרבינה בנחמת רוח הקדש׃

מגדל עז שם יהוה בו ירוץ צדיק ונשגב׃

לך עמי בא בחדריך וסגר דלתיך בעדך חבי כמעט רגע עד יעבור זעם׃

כי הנה יהוה יצא ממקומו לפקד עון ישב הארץ עליו וגלתה הארץ את דמיה ולא תכסה עוד על הרוגיה׃

אמר יהוה אם לא שרותך לטוב אם לוא הפגעתי בך בעת רעה ובעת צרה את האיב׃

ונתתי להם לב אחד ודרך אחד ליראה אותי כל הימים לטוב להם ולבניהם אחריהם׃

וכרתי להם ברית עולם אשר לא אשוב מאחריהם להיטיבי אותם ואת יראתי אתן בלבבם לבלתי סור מעלי׃