23
שירו ליהוה כל הארץ בשרו מיום אל יום ישועתו׃
24
ספרו בגוים את כבודו בכל העמים נפלאתיו׃
25
כי גדול יהוה ומהלל מאד ונורא הוא על כל אלהים׃
26
כי כל אלהי העמים אלילים ויהוה שמים עשה׃
27
הוד והדר לפניו עז וחדוה במקמו׃
28
הבו ליהוה משפחות עמים הבו ליהוה כבוד ועז׃
29
הבו ליהוה כבוד שמו שאו מנחה ובאו לפניו השתחוו ליהוה בהדרת קדש׃
30
חילו מלפניו כל הארץ אף תכון תבל בל תמוט׃
31
ישמחו השמים ותגל הארץ ויאמרו בגוים יהוה מלך׃
32
ירעם הים ומלואו יעלץ השדה וכל אשר בו׃
33
אז ירננו עצי היער מלפני יהוה כי בא לשפוט את הארץ׃
