אדני שפתי תפתח ופי יגיד תהלתך׃

ואנחנו עמך וצאן מרעיתך נודה לך לעולם לדר ודר נספר תהלתך׃

מי ימלל גבורות יהוה ישמיע כל תהלתו׃

אספרה שמך לאחי בתוך קהל אהללך׃

מאתך תהלתי בקהל רב נדרי אשלם נגד יראיו׃

אודך בקהל רב בעם עצום אהללך׃

אלה אזכרה ואשפכה עלי נפשי כי אעבר בסך אדדם עד בית אלהים בקול רנה ותודה המון חוגג׃

אודה יהוה מאד בפי ובתוך רבים אהללנו׃

כי יעמד לימין אביון להושיע משפטי נפשו׃

נדרי ליהוה אשלם נגדה נא לכל עמו׃

בחצרות בית יהוה בתוככי ירושלם הללו יה׃

פתחו לי שערי צדק אבא בם אודה יה׃

זה השער ליהוה צדיקים יבאו בו׃

הללו יה שירו ליהוה שיר חדש תהלתו בקהל חסידים׃

ישמח ישראל בעשיו בני ציון יגילו במלכם׃

זה הדבר אשר דבר יהוה עליו בזה לך לעגה לך בתולת בת ציון אחריך ראש הניעה בת ירושלם׃

הנה יהוה השמיע אל קצה הארץ אמרו לבת ציון הנה ישעך בא הנה שכרו אתו ופעלתו לפניו׃

קומי ודושי בת ציון כי קרנך אשים ברזל ופרסתיך אשים נחושה והדקות עמים רבים והחרמתי ליהוה בצעם וחילם לאדון כל הארץ׃

ואני בחסדך בטחתי יגל לבי בישועתך׃

נרננה בישועתך ובשם אלהינו נדגל ימלא יהוה כל משאלותיך׃

למנצח מזמור לדוד יהוה בעזך ישמח מלך ובישועתך מה יגיל מאד׃

ונפשי תגיל ביהוה תשיש בישועתו׃

השיבה לי ששון ישעך ורוח נדיבה תסמכני׃

ותתפלל חנה ותאמר עלץ לבי ביהוה רמה קרני ביהוה רחב פי על אויבי כי שמחתי בישועתך׃

ושאבתם מים בששון ממעיני הישועה׃

ואני ביהוה אעלוזה אגילה באלהי ישעי׃

ותגל רוחי באלהי ישעי׃