נשקו בר פן יאנף ותאבדו דרך כי יבער כמעט אפו אשרי כל חוסי בו׃

טעמו וראו כי טוב יהוה אשרי הגבר יחסה בו׃

בטחו בו בכל עת עם שפכו לפניו לבבכם אלהים מחסה לנו סלה׃

אשרי שאל יעקב בעזרו שברו על יהוה אלהיו׃

עשה שמים וארץ את הים ואת כל אשר בם השמר אמת לעולם׃

ולכן יחכה יהוה לחננכם ולכן ירום לרחמכם כי אלהי משפט יהוה אשרי כל חוכי לו׃

מי בכם ירא יהוה שמע בקול עבדו אשר הלך חשכים ואין נגה לו יבטח בשם יהוה וישען באלהיו׃

ברוך הגבר אשר יבטח ביהוה והיה יהוה מבטחו׃

והיה כעץ שתול על מים ועל יובל ישלח שרשיו ולא ירא כי יבא חם והיה עלהו רענן ובשנת בצרת לא ידאג ולא ימיש מעשות פרי׃