כי חצי שדי עמדי אשר חמתם שתה רוחי בעותי אלוה יערכוני׃

על כן מפניו אבהל אתבונן ואפחד ממנו׃

ואל הרך לבי ושדי הבהילני׃

כי פחד אלי איד אל ומשאתו לא אוכל׃

אל תהיה לי למחתה מחסי אתה ביום רעה׃

כי שבעה ברעות נפשי וחיי לשאול הגיעו׃

במתים חפשי כמו חללים שכבי קבר אשר לא זכרתם עוד והמה מידך נגזרו׃

עלי סמכה חמתך וכל משבריך ענית סלה׃

עיני דאבה מני עני קראתיך יהוה בכל יום שטחתי אליך כפי׃

היספר בקבר חסדך אמונתך באבדון׃

ואני אליך יהוה שועתי ובבקר תפלתי תקדמך׃

עני אני וגוע מנער נשאתי אמיך אפונה׃

סבוני כמים כל היום הקיפו עלי יחד׃

כי כלו בעשן ימי ועצמותי כמו קד נחרו׃

מקול אנחתי דבקה עצמי לבשרי׃

שקדתי ואהיה כצפור בודד על גג׃

כי אפר כלחם אכלתי ושקוי בבכי מסכתי׃

ימי כצל נטוי ואני כעשב איבש׃

אתה תקום תרחם ציון כי עת לחננה כי בא מועד׃

וייראו גוים את שם יהוה וכל מלכי הארץ את כבודך׃

פנה אל תפלת הערער ולא בזה את תפלתם׃

כי השקיף ממרום קדשו יהוה משמים אל ארץ הביט׃

לספר בציון שם יהוה ותהלתו בירושלם׃

ענה בדרך כחו קצר ימי׃

לפנים הארץ יסדת ומעשה ידיך שמים׃

ואתה הוא ושנותיך לא יתמו׃

גם אני לא אחשך פי אדברה בצר רוחי אשיחה במר נפשי׃

ותזנח משלום נפשי נשיתי טובה׃

מה יתאונן אדם חי גבר על חטאו׃

לבי יחיל בקרבי ואימות מות נפלו עלי׃

יראה ורעד יבא בי ותכסני פלצות׃

מקצה הארץ אליך אקרא בעטף לבי בצור ירום ממני תנחני׃

אשפך לפניו שיחי צרתי לפניו אגיד׃

בהתעטף עלי רוחי ואתה ידעת נתיבתי בארח זו אהלך טמנו פח לי׃

ותתעטף עלי רוחי בתוכי ישתומם לבי׃

זכרתי ימים מקדם הגיתי בכל פעלך במעשה ידיך אשוחח׃