ויאמר יהוה אל משה לך אל העם וקדשתם היום ומחר וכבסו שמלתם׃

מן שמים נלחמו הכוכבים ממסלותם נלחמו עם סיסרא׃

ויתפלל יחזקיהו המלך וישעיהו בן אמוץ הנביא על זאת ויזעקו השמים׃

ויושע יהוה את יחזקיהו ואת ישבי ירושלם מיד סנחריב מלך אשור ומיד כל וינהלם מסביב׃

ורעשו מפני דגי הים ועוף השמים וחית השדה וכל הרמש הרמש על האדמה וכל האדם אשר על פני האדמה ונהרסו ההרים ונפלו המדרגות וכל חומה לארץ תפול׃

ונשפטתי אתו בדבר ובדם וגשם שוטף ואבני אלגביש אש וגפרית אמטיר עליו ועל אגפיו ועל עמים רבים אשר אתו׃

הרפו ודעו כי אנכי אלהים ארום בגוים ארום בארץ׃

ויהי פחד אלהים על כל ממלכות הארצות בשמעם כי נלחם יהוה עם אויבי ישראל׃

ותשקט מלכות יהושפט וינח לו אלהיו מסביב׃

ויהוה בהיכל קדשו הס מפניו כל הארץ׃

הס כל בשר מפני יהוה כי נעור ממעון קדשו׃