מה רבו מעשיך יהוה כלם בחכמה עשית מלאה הארץ קנינך׃

שם אניות יהלכון לויתן זה יצרת לשחק בו׃

תתן להם ילקטון תפתח ידך ישבעון טוב׃

כי מה טובו ומה יפיו דגן בחורים ותירוש ינובב בתלות׃

וגם לא חדל להעיד על עצמו וייטב לנו בתתו מטר מן השמים ועתות שבע וימלא לבותינו מזון וששון׃

ישמחו השמים ותגל הארץ ירעם הים ומלאו׃

לפני יהוה כי בא כי בא לשפט הארץ ישפט תבל בצדק ועמים באמונתו׃

ירעם הים ומלאו תבל וישבי בה׃

לפני יהוה כי בא לשפט הארץ ישפט תבל בצדק ועמים במישרים׃

יששום מדבר וציה ותגל ערבה ותפרח כחבצלת׃

פרח תפרח ותגל אף גילת ורנן כבוד הלבנון נתן לה הדר הכרמל והשרון המה יראו כבוד יהוה הדר אלהינו׃

ופדויי יהוה ישבון ובאו ציון ברנה ושמחת עולם על ראשם ששון ושמחה ישיגו ונסו יגון ואנחה׃

פצחו רננו יחדו חרבות ירושלם כי נחם יהוה עמו גאל ירושלם׃

כי בשמחה תצאו ובשלום תובלון ההרים והגבעות יפצחו לפניכם רנה וכל עצי השדה ימחאו כף׃

ונאספה שמחה וגיל מכרמל ומארץ מואב ויין מיקבים השבתי לא ידרך הידד הידד לא הידד׃