יומם יצוה יהוה חסדו ובלילה שירה עמי תפלה לאל חיי׃

אחזת שמרות עיני נפעמתי ולא אדבר׃

אזכרה נגינתי בלילה עם לבבי אשיחה ויחפש רוחי׃

זכרתי בלילה שמך יהוה ואשמרה תורתך׃

קדמתי בנשף ואשועה לדבריך יחלתי׃

קדמו עיני אשמרות לשיח באמרתך׃

ולי מה יקרו רעיך אל מה עצמו ראשיהם׃

אספרם מחול ירבון הקיצתי ועודי עמך׃

יעלזו חסידים בכבוד ירננו על משכבותם׃

על משכבי בלילות בקשתי את שאהבה נפשי בקשתיו ולא מצאתיו׃

אקומה נא ואסובבה בעיר בשוקים וברחבות אבקשה את שאהבה נפשי בקשתיו ולא מצאתיו׃

אני ישנה ולבי ער קול דודי דופק פתחי לי אחתי רעיתי יונתי תמתי שראשי נמלא טל קוצותי רסיסי לילה׃

קומי רני בליל לראש אשמרות שפכי כמים לבך נכח פני אדני שאי אליו כפיך על נפש עולליך העטופים ברעב בראש כל חוצות׃