Psaumes 28:8
יהוה עז למו ומעוז ישועות משיחו הוא׃
Psaumes 18:1
למנצח לעבד יהוה לדוד אשר דבר ליהוה את דברי השירה הזאת ביום הציל יהוה אותו מכף כל איביו ומיד שאול ויאמר ארחמך יהוה חזקי׃
Psaumes 18:2
יהוה סלעי ומצודתי ומפלטי אלי צורי אחסה בו מגני וקרן ישעי משגבי׃
Psaumes 19:14
יהיו לרצון אמרי פי והגיון לבי לפניך יהוה צורי וגאלי׃
Psaumes 46:1
למנצח לבני קרח על עלמות שיר אלהים לנו מחסה ועז עזרה בצרות נמצא מאד׃
Esaïe 12:2
הנה אל ישועתי אבטח ולא אפחד כי עזי וזמרת יה יהוה ויהי לי לישועה׃
Esaïe 45:24
אך ביהוה לי אמר צדקות ועז עדיו יבוא ויבשו כל הנחרים בו׃
Ephésiens 6:10
סוף דבר אחי חזקו באדנינו ובעז גבורתו׃
Psaumes 84:11
כי שמש ומגן יהוה אלהים חן וכבוד יתן יהוה לא ימנע טוב להלכים בתמים׃
Psaumes 91:4
באברתו יסך לך ותחת כנפיו תחסה צנה וסחרה אמתו׃
Génèse 15:1
אחר הדברים האלה היה דבר יהוה אל אברם במחזה לאמר אל תירא אברם אנכי מגן לך שכרך הרבה מאד׃
Psaumes 13:5
ואני בחסדך בטחתי יגל לבי בישועתך׃
Psaumes 22:4
בך בטחו אבתינו בטחו ותפלטמו׃
Psaumes 56:3
יום אירא אני אליך אבטח׃
Psaumes 56:4
באלהים אהלל דברו באלהים בטחתי לא אירא מה יעשה בשר לי׃
Psaumes 118:6-9
6
יהוה לי לא אירא מה יעשה לי אדם׃
7
יהוה לי בעזרי ואני אראה בשנאי׃
8
טוב לחסות ביהוה מבטח באדם׃
9
טוב לחסות ביהוה מבטח בנדיבים׃
Psaumes 118:13-15
13
דחה דחיתני לנפל ויהוה עזרני׃
14
עזי וזמרת יה ויהי לי לישועה׃
15
קול רנה וישועה באהלי צדיקים ימין יהוה עשה חיל׃
Psaumes 16:9-11
9
לכן שמח לבי ויגל כבודי אף בשרי ישכן לבטח׃
10
כי לא תעזב נפשי לשאול לא תתן חסידך לראות שחת׃
11
תודיעני ארח חיים שבע שמחות את פניך נעמות בימינך נצח׃
Psaumes 21:1
למנצח מזמור לדוד יהוה בעזך ישמח מלך ובישועתך מה יגיל מאד׃
Psaumes 30:11
הפכת מספדי למחול לי פתחת שקי ותאזרני שמחה׃
Psaumes 30:12
למען יזמרך כבוד ולא ידם יהוה אלהי לעולם אודך׃
Psaumes 33:21
כי בו ישמח לבנו כי בשם קדשו בטחנו׃
Psaumes 68:3
וצדיקים ישמחו יעלצו לפני אלהים וישישו בשמחה׃
Psaumes 68:4
שירו לאלהים זמרו שמו סלו לרכב בערבות ביה שמו ועלזו לפניו׃
Esaïe 61:10
שוש אשיש ביהוה תגל נפשי באלהי כי הלבישני בגדי ישע מעיל צדקה יעטני כחתן יכהן פאר וככלה תעדה כליה׃
Psaumes 96:1-3
1
שירו ליהוה שיר חדש שירו ליהוה כל הארץ׃
2
שירו ליהוה ברכו שמו בשרו מיום ליום ישועתו׃
3
ספרו בגוים כבודו בכל העמים נפלאותיו׃
Exode 15:1-21
1
אז ישיר משה ובני ישראל את השירה הזאת ליהוה ויאמרו לאמר אשירה ליהוה כי גאה גאה סוס ורכבו רמה בים׃
2
עזי וזמרת יה ויהי לי לישועה זה אלי ואנוהו אלהי אבי וארממנהו׃
3
יהוה איש מלחמה יהוה שמו׃
4
מרכבת פרעה וחילו ירה בים ומבחר שלשיו טבעו בים סוף׃
5
תהמת יכסימו ירדו במצולת כמו אבן׃
6
ימינך יהוה נאדרי בכח ימינך יהוה תרעץ אויב׃
7
וברב גאונך תהרס קמיך תשלח חרנך יאכלמו כקש׃
8
וברוח אפיך נערמו מים נצבו כמו נד נזלים קפאו תהמת בלב ים׃
9
אמר אויב ארדף אשיג אחלק שלל תמלאמו נפשי אריק חרבי תורישמו ידי׃
10
נשפת ברוחך כסמו ים צללו כעופרת במים אדירים׃
11
מי כמכה באלם יהוה מי כמכה נאדר בקדש נורא תהלת עשה פלא׃
12
נטית ימינך תבלעמו ארץ׃
13
נחית בחסדך עם זו גאלת נהלת בעזך אל נוה קדשך׃
14
שמעו עמים ירגזון חיל אחז ישבי פלשת׃
15
אז נבהלו אלופי אדום אילי מואב יאחזמו רעד נמגו כל ישבי כנען׃
16
תפל עליהם אימתה ופחד בגדל זרועך ידמו כאבן עד יעבר עמך יהוה עד יעבר עם זו קנית׃
17
תבאמו ותטעמו בהר נחלתך מכון לשבתך פעלת יהוה מקדש אדני כוננו ידיך׃
18
יהוה ימלך לעלם ועד׃
19
כי בא סוס פרעה ברכבו ובפרשיו בים וישב יהוה עלהם את מי הים ובני ישראל הלכו ביבשה בתוך הים׃
20
ותקח מרים הנביאה אחות אהרן את התף בידה ותצאן כל הנשים אחריה בתפים ובמחלת׃
21
ותען להם מרים שירו ליהוה כי גאה גאה סוס ורכבו רמה בים׃
Juges 5:1-31
1
ותשר דבורה וברק בן אבינעם ביום ההוא לאמר׃
2
בפרע פרעות בישראל בהתנדב עם ברכו יהוה׃
3
שמעו מלכים האזינו רזנים אנכי ליהוה אנכי אשירה אזמר ליהוה אלהי ישראל׃
4
יהוה בצאתך משעיר בצעדך משדה אדום ארץ רעשה גם שמים נטפו גם עבים נטפו מים׃
5
הרים נזלו מפני יהוה זה סיני מפני יהוה אלהי ישראל׃
6
בימי שמגר בן ענת בימי יעל חדלו ארחות והלכי נתיבות ילכו ארחות עקלקלות׃
7
חדלו פרזון בישראל חדלו עד שקמתי דבורה שקמתי אם בישראל׃
8
יבחר אלהים חדשים אז לחם שערים מגן אם יראה ורמח בארבעים אלף בישראל׃
9
לבי לחוקקי ישראל המתנדבים בעם ברכו יהוה׃
10
רכבי אתנות צחרות ישבי על מדין והלכי על דרך שיחו׃
11
מקול מחצצים בין משאבים שם יתנו צדקות יהוה צדקת פרזנו בישראל אז ירדו לשערים עם יהוה׃
12
עורי עורי דבורה עורי עורי דברי שיר קום ברק ושבה שביך בן אבינעם׃
13
אז ירד שריד לאדירים עם יהוה ירד לי בגבורים׃
14
מני אפרים שרשם בעמלק אחריך בנימין בעממיך מני מכיר ירדו מחקקים ומזבולן משכים בשבט ספר׃
15
ושרי ביששכר עם דברה ויששכר כן ברק בעמק שלח ברגליו בפלגות ראובן גדלים חקקי לב׃
16
למה ישבת בין המשפתים לשמע שרקות עדרים לפלגות ראובן גדולים חקרי לב׃
17
גלעד בעבר הירדן שכן ודן למה יגור אניות אשר ישב לחוף ימים ועל מפרציו ישכון׃
18
זבלון עם חרף נפשו למות ונפתלי על מרומי שדה׃
19
באו מלכים נלחמו אז נלחמו מלכי כנען בתענך על מי מגדו בצע כסף לא לקחו׃
20
מן שמים נלחמו הכוכבים ממסלותם נלחמו עם סיסרא׃
21
נחל קישון גרפם נחל קדומים נחל קישון תדרכי נפשי עז׃
22
אז הלמו עקבי סוס מדהרות דהרות אביריו׃
23
אורו מרוז אמר מלאך יהוה ארו ארור ישביה כי לא באו לעזרת יהוה לעזרת יהוה בגבורים׃
24
תברך מנשים יעל אשת חבר הקיני מנשים באהל תברך׃
25
מים שאל חלב נתנה בספל אדירים הקריבה חמאה׃
26
ידה ליתד תשלחנה וימינה להלמות עמלים והלמה סיסרא מחקה ראשו ומחצה וחלפה רקתו׃
27
בין רגליה כרע נפל שכב בין רגליה כרע נפל באשר כרע שם נפל שדוד׃
28
בעד החלון נשקפה ותיבב אם סיסרא בעד האשנב מדוע בשש רכבו לבוא מדוע אחרו פעמי מרכבותיו׃
29
חכמות שרותיה תענינה אף היא תשיב אמריה לה׃
30
הלא ימצאו יחלקו שלל רחם רחמתים לראש גבר שלל צבעים לסיסרא שלל צבעים רקמה צבע רקמתים לצוארי שלל׃
31
כן יאבדו כל אויביך יהוה ואהביו כצאת השמש בגברתו ותשקט הארץ ארבעים שנה׃
1 Samuel 2:1-11
1
ותתפלל חנה ותאמר עלץ לבי ביהוה רמה קרני ביהוה רחב פי על אויבי כי שמחתי בישועתך׃
2
אין קדוש כיהוה כי אין בלתך ואין צור כאלהינו׃
3
אל תרבו תדברו גבהה גבהה יצא עתק מפיכם כי אל דעות יהוה ולא נתכנו עללות׃
4
קשת גברים חתים ונכשלים אזרו חיל׃
5
שבעים בלחם נשכרו ורעבים חדלו עד עקרה ילדה שבעה ורבת בנים אמללה׃
6
יהוה ממית ומחיה מוריד שאול ויעל׃
7
יהוה מוריש ומעשיר משפיל אף מרומם׃
8
מקים מעפר דל מאשפת ירים אביון להושיב עם נדיבים וכסא כבוד ינחלם כי ליהוה מצקי ארץ וישת עליהם תבל׃
9
רגלי חסידו ישמר ורשעים בחשך ידמו כי לא בכח יגבר איש׃
10
יהוה יחתו מריבו עלו בשמים ירעם יהוה ידין אפסי ארץ ויתן עז למלכו וירם קרן משיחו׃
11
וילך אלקנה הרמתה על ביתו והנער היה משרת את יהוה את פני עלי הכהן׃
2 Samuel 22:1-51
1
וידבר דוד ליהוה את דברי השירה הזאת ביום הציל יהוה אתו מכף כל איביו ומכף שאול׃
2
ויאמר יהוה סלעי ומצדתי ומפלטי לי׃
3
אלהי צורי אחסה בו מגני וקרן ישעי משגבי ומנוסי משעי מחמס תשעני׃
4
מהלל אקרא יהוה ומאיבי אושע׃
5
כי אפפני משברי מות נחלי בליעל יבעתני׃
6
חבלי שאול סבני קדמני מקשי מות׃
7
בצר לי אקרא יהוה ואל אלהי אקרא וישמע מהיכלו קולי ושועתי באזניו׃
8
ותגעש ותרעש הארץ מוסדות השמים ירגזו ויתגעשו כי חרה לו׃
9
עלה עשן באפו ואש מפיו תאכל גחלים בערו ממנו׃
10
ויט שמים וירד וערפל תחת רגליו׃
11
וירכב על כרוב ויעף וירא על כנפי רוח׃
12
וישת חשך סביבתיו סכות חשרת מים עבי שחקים׃
13
מנגה נגדו בערו גחלי אש׃
14
ירעם מן שמים יהוה ועליון יתן קולו׃
15
וישלח חצים ויפיצם ברק ויהמם׃
16
ויראו אפקי ים יגלו מסדות תבל בגערת יהוה מנשמת רוח אפו׃
17
ישלח ממרום יקחני ימשני ממים רבים׃
18
יצילני מאיבי עז משנאי כי אמצו ממני׃
19
יקדמני ביום אידי ויהי יהוה משען לי׃
20
ויצא למרחב אתי יחלצני כי חפץ בי׃
21
יגמלני יהוה כצדקתי כבר ידי ישיב לי׃
22
כי שמרתי דרכי יהוה ולא רשעתי מאלהי׃
23
כי כל משפטו לנגדי וחקתיו לא אסור ממנה׃
24
ואהיה תמים לו ואשתמרה מעוני׃
25
וישב יהוה לי כצדקתי כברי לנגד עיניו׃
26
עם חסיד תתחסד עם גבור תמים תתמם׃
27
עם נבר תתבר ועם עקש תתפל׃
28
ואת עם עני תושיע ועיניך על רמים תשפיל׃
29
כי אתה נירי יהוה ויהוה יגיה חשכי׃
30
כי בכה ארוץ גדוד באלהי אדלג שור׃
31
האל תמים דרכו אמרת יהוה צרופה מגן הוא לכל החסים בו׃
32
כי מי אל מבלעדי יהוה ומי צור מבלעדי אלהינו׃
33
האל מעוזי חיל ויתר תמים דרכו׃
34
משוה רגליו כאילות ועל במותי יעמדני׃
35
מלמד ידי למלחמה ונחת קשת נחושה זרעתי׃
36
ותתן לי מגן ישעך וענתך תרבני׃
37
תרחיב צעדי תחתני ולא מעדו קרסלי׃
38
ארדפה איבי ואשמידם ולא אשוב עד כלותם׃
39
ואכלם ואמחצם ולא יקומון ויפלו תחת רגלי׃
40
ותזרני חיל למלחמה תכריע קמי תחתני׃
41
ואיבי תתה לי ערף משנאי ואצמיתם׃
42
ישעו ואין משיע אל יהוה ולא ענם׃
43
ואשחקם כעפר ארץ כטיט חוצות אדקם ארקעם׃
44
ותפלטני מריבי עמי תשמרני לראש גוים עם לא ידעתי יעבדני׃
45
בני נכר יתכחשו לי לשמוע אזן ישמעו לי׃
46
בני נכר יבלו ויחגרו ממסגרותם׃
47
חי יהוה וברוך צורי וירם אלהי צור ישעי׃
48
האל הנתן נקמת לי ומוריד עמים תחתני׃
49
ומוציאי מאיבי ומקמי תרוממני מאיש חמסים תצילני׃
50
על כן אודך יהוה בגוים ולשמך אזמר׃
51
מגדיל ישועות מלכו ועשה חסד למשיחו לדוד ולזרעו עד עולם׃
Apocalypse 5:9
וישירו שיר חדש לאמר לך נאה לקחת את הספר ולפתח את חותמיו כי אתה נשחטת ובדמך קניתנו לאלהים מכל משפחה ולשון וכל עם וגוי׃
Apocalypse 15:3
וישירו את שירת משה עבד אלהים ושירת השה לאמר גדולים מעשיך ונפלאים יהוה אלהים צבאות צדק ואמת דרכיך מלך הגוים׃