אלה ברכב ואלה בסוסים ואנחנו בשם יהוה אלהינו נזכיר׃

אין המלך נושע ברב חיל גבור לא ינצל ברב כח׃

הנה עין יהוה אל יראיו למיחלים לחסדו׃

התתן לסוס גבורה התלביש צוארו רעמה׃

יחפרו בעמק וישיש בכח יצא לקראת נשק׃

עליו תרנה אשפה להב חנית וכידון׃

בדי שפר יאמר האח ומרחוק יריח מלחמה רעם שרים ותרועה׃

סוס מוכן ליום מלחמה וליהוה התשועה׃

הוי הירדים מצרים לעזרה על סוסים ישענו ויבטחו על רכב כי רב ועל פרשים כי עצמו מאד ולא שעו על קדוש ישראל ואת יהוה לא דרשו׃

ואת בית יהודה ארחם והושעתים ביהוה אלהיהם ולא אושיעם בקשת ובחרב ובמלחמה בסוסים ובפרשים׃

ויאמר יהוה אל שמואל אל תבט אל מראהו ואל גבה קומתו כי מאסתיהו כי לא אשר יראה האדם כי האדם יראה לעינים ויהוה יראה ללבב׃

שאול ויהונתן הנאהבים והנעימם בחייהם ובמותם לא נפרדו מנשרים קלו מאריות גברו׃

ויהיו שם שלשה בני צרויה יואב ואבישי ועשהאל ועשהאל קל ברגליו כאחד הצבים אשר בשדה׃

ויפן אבנר אחריו ויאמר האתה זה עשהאל ויאמר אנכי׃

ויסף עוד אבנר לאמר אל עשהאל סור לך מאחרי למה אככה ארצה ואיך אשא פני אל יואב אחיך׃

שבתי וראה תחת השמש כי לא לקלים המרוץ ולא לגבורים המלחמה וגם לא לחכמים לחם וגם לא לנבנים עשר וגם לא לידעים חן כי עת ופגע יקרה את כלם׃