לכו וראו מפעלות אלהים נורא עלילה על בני אדם׃

הפך ים ליבשה בנהר יעברו ברגל שם נשמחה בו׃

אתה פוררת בעזך ים שברת ראשי תנינים על המים׃

בקע ים ויעבירם ויצב מים כמו נד׃

ויגער בים סוף ויחרב ויוליכם בתהמות כמדבר׃

ויכסו מים צריהם אחד מהם לא נותר׃

ויט משה את ידו על הים ויולך יהוה את הים ברוח קדים עזה כל הלילה וישם את הים לחרבה ויבקעו המים׃

ויבאו בני ישראל בתוך הים ביבשה והמים להם חמה מימינם ומשמאלם׃

ובני ישראל הלכו ביבשה בתוך הים והמים להם חמה מימינם ומשמאלם׃

מוליך לימין משה זרוע תפארתו בוקע מים מפניהם לעשות לו שם עולם׃

מוליכם בתהמות כסוס במדבר לא יכשלו׃

באמונה עברו את ים סוף ביבשה אשר נסו מצרים גם המה לעבר בו ויטבעו׃