כושל יקימון מליך וברכים כרעות תאמץ׃

אאמצכם במו פי וניד שפתי יחשך׃

יש בוטה כמדקרות חרב ולשון חכמים מרפא׃

לחכם לב יקרא נבון ומתק שפתים יסיף לקח׃

לב חכם ישכיל פיהו ועל שפתיו יסיף לקח׃

מות וחיים ביד לשון ואהביה יאכל פריה׃

תפוחי זהב במשכיות כסף דבר דבר על אפניו׃

בקש קהלת למצא דברי חפץ וכתוב ישר דברי אמת׃

דברי חכמים כדרבנות וכמשמרות נטועים בעלי אספות נתנו מרעה אחד׃

מי יתן החרש תחרישון ותהי לכם לחכמה׃

הקץ לדברי רוח או מה ימריצך כי תענה׃

גם אנכי ככם אדברה לו יש נפשכם תחת נפשי אחבירה עליכם במלים ואניעה עליכם במו ראשי׃

ואיך תנחמוני הבל ותשובתיכם נשאר מעל׃

ואם לא אפו מי יכזיבני וישם לאל מלתי׃

ובשלשת רעיו חרה אפו על אשר לא מצאו מענה וירשיעו את איוב׃