צרר מים בעביו ולא נבקע ענן תחתם׃

אף אם יבין מפרשי עב תשאות סכתו׃

עטה אור כשלמה נוטה שמים כיריעה׃

המקרה במים עליותיו השם עבים רכובו המהלך על כנפי רוח׃

הישב על חוג הארץ וישביה כחגבים הנוטה כדק שמים וימתחם כאהל לשבת׃

לקול תתו המון מים בשמים ויעלה נשאים מקצה ארץ ברקים למטר עשה ויוצא רוח מאצרתיו׃

כי אמנם לא שקר מלי תמים דעות עמך׃

מה רבו מעשיך יהוה כלם בחכמה עשית מלאה הארץ קנינך׃

גדול אדונינו ורב כח לתבונתו אין מספר׃

יהוה בחכמה יסד ארץ כונן שמים בתבונה׃

בדעתו תהומות נבקעו ושחקים ירעפו טל׃

עשה ארץ בכחו מכין תבל בחכמתו ובתבונתו נטה שמים׃