ויסך בדלתים ים בגיחו מרחם יצא׃

ואשבר עליו חקי ואשים בריח ודלתים׃

כנס כנד מי הים נתן באצרות תהומות׃

תהום כלבוש כסיתו על הרים יעמדו מים׃

יעלו הרים ירדו בקעות אל מקום זה יסדת להם׃

בשומו לים חקו ומים לא יעברו פיו בחוקו מוסדי ארץ׃

האותי לא תיראו נאם יהוה אם מפני לא תחילו אשר שמתי חול גבול לים חק עולם ולא יעברנהו ויתגעשו ולא יוכלו והמו גליו ולא יעברנהו׃

עד כל ימי הארץ זרע וקציר וקר וחם וקיץ וחרף ויום ולילה לא ישבתו׃

כי מי נח זאת לי אשר נשבעתי מעבר מי נח עוד על הארץ כן נשבעתי מקצף עליך ומגער בך׃

כי ההרים ימושו והגבעות תמוטנה וחסדי מאתך לא ימוש וברית שלומי לא תמוט אמר מרחמך יהוה׃