ובני ישראל פרו וישרצו וירבו ויעצמו במאד מאד ותמלא הארץ אתם׃

וייטב אלהים למילדת וירב העם ויעצמו מאד׃

ויברכם וירבו מאד ובהמתם לא ימעיט׃

הרבית הגוי לא הגדלת השמחה שמחו לפניך כשמחת בקציר כאשר יגילו בחלקם שלל׃

יספת לגוי יהוה יספת לגוי נכבדת רחקת כל קצוי ארץ׃

הבאים ישרש יעקב יציץ ופרח ישראל ומלאו פני תבל תנובה׃

הביטו אל אברהם אביכם ואל שרה תחוללכם כי אחד קראתיו ואברכהו וארבהו׃

הקטן יהיה לאלף והצעיר לגוי עצום אני יהוה בעתה אחישנה׃

ויצא מהם תודה וקול משחקים והרבתים ולא ימעטו והכבדתים ולא יצערו׃

אשר לא יספר צבא השמים ולא ימד חול הים כן ארבה את זרע דוד עבדי ואת הלוים משרתי אתי׃

אשרקה להם ואקבצם כי פדיתים ורבו כמו רבו׃