זכר כי רוח חיי לא תשוב עיני לראות טוב׃

זכר רחמיך יהוה וחסדיך כי מעולם המה׃

חטאות נעורי ופשעי אל תזכר כחסדך זכר לי אתה למען טובך יהוה׃

ראה עניי ועמלי ושא לכל חטאותי׃

זכר אני מה חלד על מה שוא בראת כל בני אדם׃

זכרני יהוה ברצון עמך פקדני בישועתך׃

וייצר יהוה אלהים את האדם עפר מן האדמה ויפח באפיו נשמת חיים ויהי האדם לנפש חיה׃

בזעת אפיך תאכל לחם עד שובך אל האדמה כי ממנה לקחת כי עפר אתה ואל עפר תשוב׃

הוי רב את יצרו חרש את חרשי אדמה היאמר חמר ליצרו מה תעשה ופעלך אין ידים לו׃

ועתה יהוה אבינו אתה אנחנו החמר ואתה יצרנו ומעשה ידך כלנו׃

הכיוצר הזה לא אוכל לעשות לכם בית ישראל נאם יהוה הנה כחמר ביד היוצר כן אתם בידי בית ישראל׃

לשחת קראתי אבי אתה אמי ואחתי לרמה׃

יבש כחרש כחי ולשוני מדבק מלקוחי ולעפר מות תשפתני׃

תשב אנוש עד דכא ותאמר שובו בני אדם׃

וישב העפר על הארץ כשהיה והרוח תשוב אל האלהים אשר נתנה׃

אם אין רשות ליצר על החמר לעשות מגלם אחד כלי אחד לכבוד ואחד לקלון׃