והמלך יענה ויאמר אליהם אמן אמר אני לכם מה שעשיתם לאחד מאחי הצעירים האלה לי עשיתם׃

ויגר מואב מפני העם מאד כי רב הוא ויקץ מואב מפני בני ישראל׃

וישלח מלאכים אל בלעם בן בעור פתורה אשר על הנהר ארץ בני עמו לקרא לו לאמר הנה עם יצא ממצרים הנה כסה את עין הארץ והוא ישב ממלי׃

ויקם בלק בן צפור מלך מואב וילחם בישראל וישלח ויקרא לבלעם בן בעור לקלל אתכם׃

ולא אביתי לשמע לבלעם ויברך ברוך אתכם ואצל אתכם מידו׃

מה אקב לא קבה אל ומה אזעם לא זעם יהוה׃

מי מנה עפר יעקב ומספר את רבע ישראל תמת נפשי מות ישרים ותהי אחריתי כמהו׃

מה טבו אהליך יעקב משכנתיך ישראל׃

יזל מים מדליו וזרעו במים רבים וירם מאגג מלכו ותנשא מלכתו׃

כרע שכב כארי וכלביא מי יקימנו מברכיך ברוך וארריך ארור׃

ולא אבה יהוה אלהיך לשמע אל בלעם ויהפך יהוה אלהיך לך את הקללה לברכה כי אהבך יהוה אלהיך׃

יקללו המה ואתה תברך קמו ויבשו ועבדך ישמח׃

עמי זכר נא מה יעץ בלק מלך מואב ומה ענה אתו בלעם בן בעור מן השטים עד הגלגל למען דעת צדקות יהוה׃