וזה אשר תעשה על המזבח כבשים בני שנה שנים ליום תמיד׃

ועשרן סלת בלול בשמן כתית רבע ההין ונסך רבעית ההין יין לכבש האחד׃

עלת תמיד לדרתיכם פתח אהל מועד לפני יהוה אשר אועד לכם שמה לדבר אליך שם׃

וידבר יהוה אל משה לאמר׃

ששת ימים תעשה מלאכה וביום השביעי שבת שבתון מקרא קדש כל מלאכה לא תעשו שבת הוא ליהוה בכל מושבתיכם׃

בחדש הראשון בארבעה עשר לחדש בין הערבים פסח ליהוה׃

ביום הראשון מקרא קדש יהיה לכם כל מלאכת עבדה לא תעשו׃

וידבר יהוה אל משה לאמר׃

והניף את העמר לפני יהוה לרצנכם ממחרת השבת יניפנו הכהן׃

ומנחתו שני עשרנים סלת בלולה בשמן אשה ליהוה ריח ניחח ונסכה יין רביעת ההין׃

וספרתם לכם ממחרת השבת מיום הביאכם את עמר התנופה שבע שבתות תמימת תהיינה׃

ממושבתיכם תביאו לחם תנופה שתים שני עשרנים סלת תהיינה חמץ תאפינה בכורים ליהוה׃

וידבר יהוה אל משה לאמר׃

ואמרת להם זה האשה אשר תקריבו ליהוה כבשים בני שנה תמימם שנים ליום עלה תמיד׃

ועשירית האיפה סלת למנחה בלולה בשמן כתית רביעת ההין׃

ונסכו רביעת ההין לכבש האחד בקדש הסך נסך שכר ליהוה׃

וביום השבת שני כבשים בני שנה תמימם ושני עשרנים סלת מנחה בלולה בשמן ונסכו׃

ובראשי חדשיכם תקריבו עלה ליהוה פרים בני בקר שנים ואיל אחד כבשים בני שנה שבעה תמימם׃

ועשרן עשרון סלת מנחה בלולה בשמן לכבש האחד עלה ריח ניחח אשה ליהוה׃

ושעיר עזים אחד לחטאת ליהוה על עלת התמיד יעשה ונסכו׃

ובחמשה עשר יום לחדש הזה חג שבעת ימים מצות יאכל׃

והקרבתם אשה עלה ליהוה פרים בני בקר שנים ואיל אחד ושבעה כבשים בני שנה תמימם יהיו לכם׃

עשרון עשרון תעשה לכבש האחד לשבעת הכבשים׃

מלבד עלת הבקר אשר לעלת התמיד תעשו את אלה׃

וביום השביעי מקרא קדש יהיה לכם כל מלאכת עבדה לא תעשו׃

והקרבתם עולה לריח ניחח ליהוה פרים בני בקר שנים איל אחד שבעה כבשים בני שנה׃

עשרון עשרון לכבש האחד לשבעת הכבשים׃

ועל הנשיא יהיה העולות והמנחה והנסך בחגים ובחדשים ובשבתות בכל מועדי בית ישראל הוא יעשה את החטאת ואת המנחה ואת העולה ואת השלמים לכפר בעד בית ישראל׃

והשתחוו עם הארץ פתח השער ההוא בשבתות ובחדשים לפני יהוה׃

ומנחה איפה לאיל ולכבשים מנחה מתת ידו ושמן הין לאיפה׃

ואיפה לפר ואיפה לאיל יעשה מנחה ולכבשים כאשר תשיג ידו ושמן הין לאיפה׃

ובבוא עם הארץ לפני יהוה במועדים הבא דרך שער צפון להשתחות יצא דרך שער נגב והבא דרך שער נגב יצא דרך שער צפונה לא ישוב דרך השער אשר בא בו כי נכחו יצאו׃

ובחגים ובמועדים תהיה המנחה איפה לפר ואיפה לאיל ולכבשים מתת ידו ושמן הין לאיפה׃

וכבש בן שנתו תמים תעשה עולה ליום ליהוה בבקר בבקר תעשה אתו׃

ועשו את הכבש ואת המנחה ואת השמן בבקר בבקר עולת תמיד׃

שלש רגלים תחג לי בשנה׃

וחג הקציר בכורי מעשיך אשר תזרע בשדה וחג האסף בצאת השנה באספך את מעשיך מן השדה׃

שלוש פעמים בשנה יראה כל זכורך את פני יהוה אלהיך במקום אשר יבחר בחג המצות ובחג השבעות ובחג הסכות ולא יראה את פני יהוה ריקם׃

והעלה שלמה שלש פעמים בשנה עלות ושלמים על המזבח אשר בנה ליהוה והקטיר אתו אשר לפני יהוה ושלם את הבית׃