ודוד וכל בית ישראל מעלים את ארון יהוה בתרועה ובקול שופר׃

ויאמר דויד לשרי הלוים להעמיד את אחיהם המשררים בכלי שיר נבלים וכנרות ומצלתים משמיעים להרים בקול לשמחה׃

ודויד וכל ישראל משחקים לפני האלהים בכל עז ובשירים ובכנרות ובנבלים ובתפים ובמצלתים ובחצצרות׃

והלוים המשררים לכלם לאסף להימן לידתון ולבניהם ולאחיהם מלבשים בוץ במצלתים ובנבלים וכנרות עמדים מזרח למזבח ועמהם כהנים למאה ועשרים מחצררים בחצצרות׃

ויהי כאחד למחצצרים ולמשררים להשמיע קול אחד להלל ולהדות ליהוה וכהרים קול בחצצרות ובמצלתים ובכלי השיר ובהלל ליהוה כי טוב כי לעולם חסדו והבית מלא ענן בית יהוה׃

ויסדו הבנים את היכל יהוה ויעמידו הכהנים מלבשים בחצצרות והלוים בני אסף במצלתים להלל את יהוה על ידי דויד מלך ישראל׃

ויענו בהלל ובהודת ליהוה כי טוב כי לעולם חסדו על ישראל וכל העם הריעו תרועה גדולה בהלל ליהוה על הוסד בית יהוה׃

למנצח לבני קרח מזמור כל העמים תקעו כף הריעו לאלהים בקול רנה׃

ידבר עמים תחתינו ולאמים תחת רגלינו׃

עלה אלהים בתרועה יהוה בקול שופר׃

קדמו שרים אחר נגנים בתוך עלמות תופפות׃

הריעו ליהוה כל הארץ פצחו ורננו וזמרו׃

בחצצרות וקול שופר הריעו לפני המלך יהוה׃

הללוהו בתקע שופר הללוהו בנבל וכנור׃

הללוהו בצלצלי שמע הללוהו בצלצלי תרועה׃