שפך דם האדם באדם דמו ישפך כי בצלם אלהים עשה את האדם׃

מכה איש ומת מות יומת׃

וכי יזד איש על רעהו להרגו בערמה מעם מזבחי תקחנו למות׃

ולא תחניפו את הארץ אשר אתם בה כי הדם הוא יחניף את הארץ ולארץ לא יכפר לדם אשר שפך בה כי אם בדם שפכו׃

ויקמו עבדיו ויקשרו קשר ויכו את יואש בית מלא היורד סלא׃

ויוזבד בן שמעת ויהוזבד בן שמר עבדיו הכהו וימת ויקברו אתו עם אבתיו בעיר דוד וימלך אמציה בנו תחתיו׃

ויהי כאשר חזקה הממלכה עליו ויהרג את עבדיו המכים את המלך אביו׃

ואת בניהם לא המית כי ככתוב בתורה בספר משה אשר צוה יהוה לאמר לא ימותו אבות על בנים ובנים לא ימותו על אבות כי איש בחטאו ימותו׃