ויעזב את עצת הזקנים אשר יעצהו ויועץ את הילדים אשר גדלו אתו העמדים לפניו׃

ויחר אף יהוה באמציהו וישלח אליו נביא ויאמר לו למה דרשת את אלהי העם אשר לא הצילו את עמם מידך׃

ויהי בדברו אליו ויאמר לו הליועץ למלך נתנוך חדל לך למה יכוך ויחדל הנביא ויאמר ידעתי כי יעץ אלהים להשחיתך כי עשית זאת ולא שמעת לעצתי׃

לדעת חכמה ומוסר להבין אמרי בינה׃

לתת לפתאים ערמה לנער דעת ומזמה׃

שמע עצה וקבל מוסר למען תחכם באחריתך׃

נזם זהב וחלי כתם מוכיח חכם על אזן שמעת׃

לב חכם לימינו ולב כסיל לשמאלו׃

וגם בדרך כשהסכל הלך לבו חסר ואמר לכל סכל הוא׃