בן שלשים שנה דוד במלכו ארבעים שנה מלך׃

ודויד זקן ושבע ימים וימלך את שלמה בנו על ישראל׃

והימים אשר מלך על ישראל ארבעים שנה בחברון מלך שבע שנים ובירושלם מלך שלשים ושלוש׃

וימת בשיבה טובה שבע ימים עשר וכבוד וימלך שלמה בנו תחתיו׃

ימי שנותינו בהם שבעים שנה ואם בגבורת שמונים שנה ורהבם עמל ואון כי גז חיש ונעפה׃

ואברהם ושרה זקנים באים בימים חדל להיות לשרה ארח כנשים׃

ואברהם זקן בא בימים ויהוה ברך את אברהם בכל׃

ויהי מימים רבים אחרי אשר הניח יהוה לישראל מכל איביהם מסביב ויהושע זקן בא בימים׃

ויקרא יהושע לכל ישראל לזקניו ולראשיו ולשפטיו ולשטריו ויאמר אלהם אני זקנתי באתי בימים׃

ולא היה להם ילד כי אלישבע עקרה ושניהם באו בימים׃