כן יאבדו כל אויביך יהוה ואהביו כצאת השמש בגברתו ותשקט הארץ ארבעים שנה׃

זרעו לעולם יהיה וכסאו כשמש נגדי׃

עמך נדבת ביום חילך בהדרי קדש מרחם משחר לך טל ילדתיך׃

וארח צדיקים כאור נגה הולך ואור עד נכון היום׃

קומי אורי כי בא אורך וכבוד יהוה עליך זרח׃

והלכו גוים לאורך ומלכים לנגה זרחך׃

לא ישמע עוד חמס בארצך שד ושבר בגבוליך וקראת ישועה חומתיך ושעריך תהלה׃

לא יבוא עוד שמשך וירחך לא יאסף כי יהוה יהיה לך לאור עולם ושלמו ימי אבלך׃

על כן חצבתי בנביאים הרגתים באמרי פי ומשפטיך אור יצא׃

וזרחה לכם יראי שמי שמש צדקה ומרפא בכנפיה ויצאתם ופשתם כעגלי מרבק׃

ברחמי חסד אלהינו אשר בהם פקדנו הנגה ממרום׃

להאיר לישבי חשך וצלמות ולהכין את רגלינו אל דרך השלום׃

הוא בא לעדות להעיד על האור למען יאמינו כלם על ידו׃

ונדעה נרדפה לדעת את יהוה כשחר נכון מצאו ויבוא כגשם לנו כמלקוש יורה ארץ׃

יערף כמטר לקחי תזל כטל אמרתי כשעירם עלי דשא וכרביבים עלי עשב׃

ירד כמטר על גז כרביבים זרזיף ארץ׃

ביום ההוא יהיה צמח יהוה לצבי ולכבוד ופרי הארץ לגאון ולתפארת לפליטת ישראל׃

והיה שארית יעקב בקרב עמים רבים כטל מאת יהוה כרביבים עלי עשב אשר לא יקוה לאיש ולא ייחל לבני אדם׃