משלי שלמה בן חכם ישמח אב ובן כסיל תוגת אמו׃

לא ירעיב יהוה נפש צדיק והות רשעים יהדף׃

אגר בקיץ בן משכיל נרדם בקציר בן מביש׃

זכר צדיק לברכה ושם רשעים ירקב׃

הולך בתם ילך בטח ומעקש דרכיו יודע׃

מקור חיים פי צדיק ופי רשעים יכסה חמס׃

בשפתי נבון תמצא חכמה ושבט לגו חסר לב׃

הון עשיר קרית עזו מחתת דלים רישם׃

ארח לחיים שומר מוסר ועוזב תוכחת מתעה׃

ברב דברים לא יחדל פשע וחשך שפתיו משכיל׃

שפתי צדיק ירעו רבים ואוילים בחסר לב ימותו׃

כשחוק לכסיל עשות זמה וחכמה לאיש תבונה׃

כעבור סופה ואין רשע וצדיק יסוד עולם׃

יראת יהוה תוסיף ימים ושנות רשעים תקצרנה׃

מעוז לתם דרך יהוה ומחתה לפעלי און׃

פי צדיק ינוב חכמה ולשון תהפכות תכרת׃