כי יגנב איש שור או שה וטבחו או מכרו חמשה בקר ישלם תחת השור וארבע צאן תחת השה׃

אם זרחה השמש עליו דמים לו שלם ישלם אם אין לו ונמכר בגנבתו׃

כי יבער איש שדה או כרם ושלח את בעירה ובער בשדה אחר מיטב שדהו ומיטב כרמו ישלם׃

כי יתן איש אל רעהו כסף או כלים לשמר וגנב מבית האיש אם ימצא הגנב ישלם שנים׃

על כל דבר פשע על שור על חמור על שה על שלמה על כל אבדה אשר יאמר כי הוא זה עד האלהים יבא דבר שניהם אשר ירשיען אלהים ישלם שנים לרעהו׃

שבעת יהוה תהיה בין שניהם אם לא שלח ידו במלאכת רעהו ולקח בעליו ולא ישלם׃

אם טרף יטרף יבאהו עד הטרפה לא ישלם׃

אם בעליו עמו לא ישלם אם שכיר הוא בא בשכרו׃

אם מאן ימאן אביה לתתה לו כסף ישקל כמהר הבתולת׃

כל שכב עם בהמה מות יומת׃

וגר לא תונה ולא תלחצנו כי גרים הייתם בארץ מצרים׃

אם ענה תענה אתו כי אם צעק יצעק אלי שמע אשמע צעקתו׃

אם כסף תלוה את עמי את העני עמך לא תהיה לו כנשה לא תשימון עליו נשך׃

כי הוא כסותה לבדה הוא שמלתו לערו במה ישכב והיה כי יצעק אלי ושמעתי כי חנון אני׃

מלאתך ודמעך לא תאחר בכור בניך תתן לי׃

ואנשי קדש תהיון לי ובשר בשדה טרפה לא תאכלו לכלב תשלכון אתו׃